RUPTARII

RUPTARII

seu RUPTURARII, apud Gallos (qui eos Roturiers vocant) homines sunt ignobiles ac obnoxiae conditionis, cuiusmodi sunt coloni ac rustici, quibus viri Nobiles ac ingenui opponuntur: Rupturarius enim proprie colonus, apud medii aevi Scriptores, quod agrum seu terram rumpit, proscindit, colit: Postmodum Ruptarii quoque dicti sunt praedones quidam sub XI. saeculum, ex rusticis potissimum collecti ac conflati, qui provincias populabantur et interdum Principum militiae se addicebant. Matthaeus Paris. A. C. 1250. Ubi est ille ruptarius percussor impius --- In civitate igitur occubuit Oliverius de Termes, cum suis omnibus, quos Ruptarios vocamus, pugnatoribus etc. Eorum cohors Rupta, apud Guil. Britonem Philipp. l. 5. p. 152.

Quos Marcharderi sic clausit rupta —

Idem l. 7. p. 171.

—— Tecum Lupicarica rupta

Fac erat, etc.

Unde hodieque Ruta, vulgô Route, Gallis usurpatur, pro quavis turma militari, qua de voce agit Nicetas Choniates in Balduino. num. 5. et qui hunc laudat, Car. du Fresne in Glossar. ut et ad Villbarduinum. Vide quoque supra Compagnia, Coterellus, et infra in Rutta.